Brimozol

Bu dərmanı istifadə etməyə başlamazdan əvvəl bu içlik vərəqəsini sona qədər diqqətlə oxuyun
Bu içlik vərəqəsini saxlayın. Siz onu yenidən oxumalı ola bilərsiniz.
Əgər əlavə suallarınız olarsa, həkiminizdən və ya əczaçınızdan soruşun.
Bu dərman yalnız Sizin üçün yazılmışdır. Onu başqalarına verməyin. Hətta onlarda olan simptomlar Sizinki ilə eyni olsa belə, bu dərman onlar üçün zərərli ola bilər.
Əgər əlavə təsirlərdən hər hansı biri ciddi xarakter alarsa və ya bu içlik vərəqədə qeyd edilməyən hər hansı əlavə təsir meydana çıxarsa, lütfən həkiminizə və ya əczaçınıza bu barədə məlumat verin.
BRIMOZOL 0,2% (2 mq/ml) göz damcısı, məhlul

BRIMOZOL

Beynəlxalq patentləşdirilməmiş adı: Brimonidine tartrate

Tərkibi
Təsiredici maddə: 1 ml məhlulun tərkibində 2 mq brimonidin tartrat vardır
Köməkçi maddələr: benzalkonium-xlorid, polivinil spirit, natrium-xlorid, natrium-sitrat dihidrat, limon turşusu monohidrat, təmizlənmiş su və natrium-hidroksid və ya xlorid turşusu (pH-ı tənzimləmək üçün).

Təsviri
BRIMOZOL plastik flakonda şəffaf, yaşılımtıl-sarı rəngdən açıq yaşılımtıl-sarı rəngə qədər məhlul-dur.

Farmakoloji xüsusiyyətləri
BRIMOZOL-ın təsiredici maddəsi olan brimonidin tartrat simpatomimetiklər qrupuna aid olub α2-adrenoreseptorların selektiv aqonistidir. Brimonidin tartrat yerli istifadə zamanı gözdaxili mayenin sekresiyasını azaltmaqla gözdaxili təzyiqi aşağı salır.

İstifadəsinə göstərişlər
BRIMOZOL gözdaxili təzyiqi aşağı salmaq üçün istifadə olunur.
O, beta-blokator göz damcılarının əks göstəriş olduğu hallarda monoterapiya şəklində və ya bir dərman preparatının gözdaxili təzyiqi aşağı salmaq üçün kifayət etmədiyi hallarda digər göz damcıları ilə birlikdə açıqbucaqlı qlaukomanın və ya okulyar hipertenziyanın müalicəsi üçün istifadə oluna bilər.

Əks göstərişlər
Brimonidin tartrata və ya BRIMOZOL-ın digər komponentlərindən hər hansı birinə qarşı allergiya (yüksək həssaslıq).
Eyni zamanda monoaminooksidazanın (MAO) inhibitorlarının və ya digər müəyyən antidepressantların istifadəsi. Hər hansı digər antidepressantın istifadəsi barədə həkimi məlumatlandırmaq lazımdır.
Laktasiya dövrü
Körpələrdə/uşaqlarda (2 yaşa qədər) istifadəsi.

Xüsusi ehtiyatla
Aşağıdakı hallarda bu dərmanı qəbul etməzdən əvvəl həkimlə məsləhətləşmək lazımdır:
Depressiya, əqli qabiliyyətin zəifləməsi, beyin qan dövranının pozulması, ürək-damar xəstəlikləri, ətrafların qan təchizatının pozulması və ya qeyri-normal qan təzyiqi.
Böyrək və ya qaraciyər xəstəlikləri.
2 yaşdan 12 yaşa qədər uşaqlarda istifadəsi üşün zərurət yaranarsa (BRIMOZOL bu yaş qrupuna daxil olan pasiyentlərdə istifadə üçün tövsiyə olunmur).
Digər dərman vasitələri ilə qarşılıqlı təsiri
Əgər reseptsiz buraxılan dərmanlar da daxil olmaqla, hər hansı digər dərman preparatı qəbul edirsinizsə və ya əvvəllər etmisinizsə, lütfən bu barədə həkiminizə və ya əczaçıya məlumat verin.
Əgər aşağıdakı dərmanlardan hər hansı birini qəbul edirsinizsə, bunu həkiminizə bildirin:
ağrıkəsicilər, sedativ dərmanlar, opiat analgetiklər, barbituratlar və ya müntəzəm olaraq alkoqoldan sui-istifadə
anestetiklər
ürək dərmanları və ya yüksək qan təzyiqinin müalicəsi üçün dərmanlar
xlorprpmazin, metilfenidat və rezerpin kimi, metabolizmə təsir göstərə bilən dərmanlar
BRIMOZOL kimi eyni reseptorlara təsir göstərən dərmanlar, məsələn, izoprenalin və prazozin
monoaminooksidazanın (MAO) inhibitorları və digər antidepressantlar
bilavasitə gözlə bağlı olmayan hər hansı bir dərman preparatının istifadəsi
istifadə edilən dərmanlardan hər hansı biri və ya hər hansı birinin dozası dəyişdirilmişdirsə.
Bunlar BRIMOZOL ilə müalicəyə təsir göstərə bilər.

Hamiləlik və laktasiya dövründə istifadəsi
Hər hansı dərmanı qəbul etməyə başlamazdan əvvəl məsləhət üçün həkiminizə müraciət edin. Hamilə olduqda və ya hamilə olmağı planlaşdırdıqda, bu barədə həkimi məlumatlandırmaq lazımdır.
Laktasiya dövründə BRIMOZOL-ın istifadəsi əks göstərişdir.

Nəqliyyat vasitələrini və digər potensial təhlükəli mexanizmləri idarəetmə qabiliyyətinə təsiri
BRIMOZOL dumanlı və qeyri-normal görməyə səbəb ola bilər. Bu təsir gecələr və zəif işıqlanma şəraitində daha çox nəzərə çarpır.
BRIMOZOL, həmçinin, bəzi pasiyentlərdə yuxululuq və yorğunluq yarada bilər.
Əgər bu simptomlardan hər hansı biri meydana çıxarsa, onlar aradan qalxmayana qədər nəqliyyat vasitələrini və digər potensial təhlükəli mexanizmləri idarə etmək olmaz.
BRIMOZOL-ın bəzi komponentləri barədə mühüm məlumat
BRIMOZOL-ın tərkibində olan konservant (benzalkonium xlorid) gözlərə qıcıqlandırıcı təsir göstərə və həmçinin yumşaq kontakt linzaları rəngsizləşdirə bilər. Ona görə də preparatın yumşaq kontakt linzalarla təmasına yol verilməməlidir. Yumşaq kontakt linza taxan şəxslər bu göz damcısının istifadəsindən əvvəl linzaları çıxarmalıdır. Yalnız BRIMOZOL-ın damızdırılmasından ən azı 15 dəqiqə keçdikdən sonra linzaları yenidən taxmaq olar.

İstifadə qaydası və dozası
Həmişə BRIMOZOL-ı həkimin tövsiyələrinə dəqiq əməl etməklə istifadə etmək lazımdır.
Böyüklər: 12 saat intervalla, gündə 2 dəfə xəstə göz(lər)ə 1 damcı damızdırılır.
12 yaşa qədər uşaqlar: 2 yaşdan aşağı uşaqlarda BRIMOZOL istifadə edilməməlidir.
2 yaşdan 12 yaşa qədər uşaqlarda istifadəsi tövsiyə olunmur.
BRIMOZOL-ın istifadəsi üçün təlimat
Gös damcısını istifadə etməzdən əvvəl əlləri yumaq, damcını həkimin təyinatda göstərdiyi miqdarda damızdırmaq lazımdır. Əgər BRIMOZOL digər göz damcısı ilə istifadə edilirsə, onların arasında 5-15 dəqiqə interval saxlamaq lazımdır.
Göz damcısını aşağıdakı kimi istifadə etmək lazımdır:
Başınızı arxaya əyin və tavana baxın.
Kiçik cib alınana qədər aşağı göz qabağını ehtiyatla aşağı dartın.
Gözə 1 damcı düşənə qədər flakonu sıxın.
Sonra gözünüzü yumun, barmağınızla gözün küncünü sıxın (gözün burunla birləşdiyi yeri) və 1 dəqiqə saxlayın.
Damcıladıcının ucunun gözünüzə və ya hər hansı bir əşyaya toxunmasına yol verməyin.
İstifadə etdikdən sonra qapağı yerinə qoyun və bərkidin.

Doza həddinin aşılması
Böyüklər: BRIMOZOL istifadə edən böyüklərdə doza həddinin heç bir aşılması baş verməyib.
Uşaqlar: qlaukomanın müalicəsinin bir hissəsi kimi BRIMOZOL istifadə edən uşaqlarda doza həddi aşılmasının bir neçə halı barədə məlumat verilmişdir. Doza həddi aşılmasının simptomlarına yuxululuq, əzginlik, aşağı bədən temperature və nəfəsalmanın çətinləşməsi aiddir. Əgər bu baş verərsə, dərhal həkiminizlə əlaqə saxlayın.
Böyüklər və uşaqlar: əgər BRIMOZOL təsadüfən udularsa və ya lazım olduğundan artıq miqdarda BRIMOZOL istifadə olunarsa, lütfən, dərhal həkiminizə müraciət edin.
Əgər Siz BRIMOZOL-ı istifadə etməyi unutmusunuzsa
Əgər Siz bir dozanın istifadəsini unutmusunuzsa, onu xatırlayan kimi, dərhal istifadə edin. Lakin, əgər növbəti dozanın vaxtı yaxınlaşmışdırsa, o zaman unudulmuş dozanı buraxaraq, növbəti dozanı vaxtında istifadə edin və müalicəni adi rejimlə davam etdirin.
Əgər Siz BRIMOZOL-ın istifadəsini dayandırırsınızsa
Müalicədən effektiv nəticə almaq üçün BRIMOZOL hər gün istifadə edilməlidir. Həkiminizin tövsiyəsi olmadan BRIMOZOL-ın istifadəsini dayandırmayın.
Mümkün əlavə təsirləri
Bütün dərmanlar kimi, BRIMOZOL da hər kəsdə olmasa da əlavə təsirlər törədə bilər. Əlavə təsirlərin başvermə tezliyi aşağıdakı kimi ifadə edilir:
Çox ümumi: 10 pasiyentdən 1-dən çoxunda baş verir
Ümumi: 10 pasiyentdən 1-dən azında baş verir
Qeyri-ümumi: 100 pasiyentdən 1-dən azında baş verir
Nadir: 1000 pasiyentdən 1-dən azında baş verir
Çox nadir: 10 000 pasiyentdən 1-dən azında baş verir
Gözlə bağlı BRIMOZOL-ın aşağıdakı əlavə təsirləri rast gələ bilər.
Çox ümumi: Gözə allergik təsir, gözün səthini örtən şəffaf təbəqədə follikullar və ya ağ ləkələr, dumanlı görmə, gözlərin qızarması, gözdə yanma hissi, gözdə yad cismin olması hissi və ya qaşınma.
Ümumi: Gözlərin səthində dəyişikliklər, göz qapağının iltihabı, gözün səthini örtən şəffaf təbə-qənin iltihabı, qeyri-normal görmə, yapışqanlı gözlər, göz qapaının və gözün səthini örtən şəffaf təbəqənin ödemi, işığa qarşı yüksək həssaslıq, qıcıqlanma, göz qapağının qızarması, ağrı, quruluq, gözün səthinin eroziyası və rənglənməsi, gözyaşı ifrazı və ya gözün səthini örtən şəffaf təbəqənin ağarması.
Çox nadir: gözün iltihabı və ya göz bəbəyinin ölçüsünün kiçilməsi.
Bu əlavə təsirlərdən bəziləri preparatın komponentlərindən hər hansı birinin allergik təsirinin nəticəsi ola bilər.
BRIMOZOL-ın sistem əlavə təsirləri:
Çox ümumi: başağrısı, ağızda quruluq və yorğunluq/yuxululuq.
Ümumi: başgicəllənmə, soyuqdəyməyə bənzər simptomlar, mədəni və həzmi əhatə edən simptomlar, qeyri-normal dadbilmə və ya ümumi zəiflik.
Qeyri ümumi: depressiya, ürəkdöyünmə və ya ürəyin yığılma tezliyinin dəyişməsi, burunda quruluq və ümumi allergik reaksiyalar.
Nadir: təngnəfəslik.
Çox nadir: yuxusuzluq, bayılma və yüksək və ya aşağı qan təzyiqi.

Əlavə təsirlər haqqında məlumatın verilməsi
Əgər hər hansı əlavə təsir meydana çıxarsa, bu barədə həkimə, əczaçıya və ya tibb bacısına məlumat vermək lazımdır. Bura bu içlik vərəqədə qeyd edilməyən hər hansı mümkün əlavə təsir də daxildir. Siz həmçinin əlavə təsirlər barədə birbaşa milli məlumat sistemi vasitəsilə məlumat verə bilərsiniz. Əlavə təsirlər barədə məlumat verməklə, Siz bu dərmanın təhlükəsizliyi barədə daha çox məlumatın toplanmasına kömək edə bilərsiniz.

Buraxılış forması
5 ml məhlul, plastik flakonlarda. 1 flakon içlik vərəqə ilə birlikdə karton qutuya qablaşdırılır.
Saxlanma şəraiti
25°C-dən yüksək olmayan temperaturda, uşaqların əli çatmayan yerdə saxlamaq lazımdır.

Yararlılıq müddəti
Yararlılıq müddəti flakonun etiketinin və kartonqutunun üzərində EXP:-dən sonra göstərilmişdir.
Yararlılıq müddəti bitdikdən sonra istifadə etmək olmaz.
Yararlılıq müddətinin bitmə tarixi qeyd edilən ayın son gününə şamil edilir.
Əgər flakonun üzərində sınmayadavamlı möhür flakonun ilk açılışına qədər qırılmış olarsa, preparatı istifadə etməyin.
Flakonun ilk açılışından 28 gün sonra preparatın hər hansı qalığını məhv etmək lazımdır.
Dərmanlar çirkab sularına və məişət tullantıları içərisinə atılmamalıdır. Artıq istifadə edilməyən dərmanın hara və necə atılmalı olduğunu əczaçıdan soruşun. Bu tədbirlər ətraf mühitin qorunmasına xidmət edir.

Aptekdən buraxılma şərti
Resept əsasında buraxılır.